TØMRAR OG MATROS: Sunniva Bjørvik fekk sveinebrev som tømrar og Cora Hjelme fekk fagbrev som matros og gratulasjon frå Ann-Kristin Kristoffersen, leiar av yrkesopplæringsnemnda, fylkesordførar Jon Askeland og oldgesell Inge Bauge. (Foto: Bjarte Brask Eriksen/Vestland fylkeskommune)

Gratulerte nye tømrare på sveinegildet i Håkonshallen

Rekruttering: 33 tømrare og 167 kandidatar frå andre fag fekk endeleg sine sveine- eller fagbrev på sveinegildet i Håkonshallen.

Sveinegildet vart skipa til av Bergen Næringsråd, Opplæringskontora og Vestland fylkeskommune. Sveinegildet har lange og historiske tradisjonar i Bergen, men seremonien i vår tid er ei forenkla utgåve.

Over 200 kandidatar i 41 ulike fag fekk utdelt sveine- eller fagbrev, skriv Vestland fylkeskommune på sine nettsider.

Tømrarfaget størst

Sveinegildet vart leia av oldgesell Inge Bauge som og er leiar av Byggmestrenes Servicekontor AS. Med septer i handa leia han prosesjonen av alle kandidatane inn og ut av Håkonshallen.

Alle kandidatane marsjerte inn og ut av Håkonshallen. leia av oldgesell Inge Bauge og fire skutelsveiner frå Slåtthaug videregående skole. (Foto: Bjarte Brask Eriksen/Vestland fylkeskommune)

Det største faget på utdelinga var tømrarfaget med 33 kandidatar. Sunniva Bjørvik er ein av kandidatane.

– Eg gjekk på Laksevåg vidaregåande skule. Studiespesialisering hadde eg ikkje lyst å ta, så eg tenkte på tømraryrket. Eg har vore med farfaren min som er tømrar, og eg likar fysisk arbeid. Og så kan eg bygge mitt eige hus, seier Sunniva Bjørvik.

No går Bjørvik på Sotra vidaregåande skule for å få studiekompetanse.

– Dette skuleåret er det første gongen Sotra vgs har oppretta påbygg, vg4, for kandidatar med fag- og sveinebrev. Det er ikkje lett å velje yrke, men eg tenker på å studere innan berekraftig utvikling innan tømrarfaget. Til våren skal eg vurdere kvar vegen går vidare, seier tømrarsvein Bjørvik.

Verdifull fagutdanning uansett alder

Fylkesordførar Jon Askeland helsa kandidatane.

– Eg er stolt av dykk. De har valt den rette utdanninga og etterutdanninga. Dette er starten på neste fase i yrkeslivet, å nytte kunnskapen og ferdigheitane som fagarbeidar. Å skape framtida di vidare i arbeidslivet og tene pengar. De har møtt og vil møte ei verd og jobbsituasjon der endring og omstilling blir det vanlege. Då er de veldig verdifulle, for det du kan, kan alltid byggjast vidare på, og med dine eigne menneskelege eigenskapar, så har du grunnsteinen i jobblivet ditt for det du vel vidare.

Sunniva Bjørvik fekk sveinebrev som tømrar og Cora Hjelme fekk fagbrev som matros og gratulasjon frå Ann-Kristin Kristoffersen, leiar av yrkesopplæringsnemnda, fylkesordførar Jon Askeland og oldgesell Inge Bauge. (Foto: Bjarte Brask Eriksen/Vestland fylkeskommune)

Fylkesordføraren hadde også ei spesiell helsing.

– Mange av dykk som er her i dag, har tatt fag- eller sveinebrev i vaksen alder. Det står stor respekt av, etter mange år, å satse som ufaglært, og gjennomføre både eksamen og den praktiske prøva, i tillegg til jobb og familieliv, sa fylkesordførar Jon Askeland.

Legg igjen en kommentar

Din e-postadresse vil ikke bli publisert. Obligatoriske felt er merket med *